الأحد، 5 مايو 2013

التفاصيل ذات الثِقل المُحتملْ .. The BEARABLE heaviness of Details


 هانيــة عَســوَد

على مفارق نواصي ومسارات حياتنا وببعض المراحل الإنتقالية الشخصية والعامة بما فيها مراحل الإنتقال ما بين الفصول أو ما بين وظائف وحيوات وبيوت ودول، البعض مننا (لو مش كلنا) بيعيش بفوضى مشاعر وأحساسيس وحواس كتيرة.  جزء من هاي الفوضى ممكن يبقى من ردة فعلنا على نظام مش قادرين نوقف قدامه (بما فيها يمكن نُظم إحنا فارضينها على حالنا) أو على قرار جديد أخدناه، أو فعل حصل علينا أو شخص دخل أو طلع أو دخل وطلع من حياتنا وأثروا علينا وفينا، أو يمكن مشاعر فُرض علينا إننا نقبلها ونحسها .. مشاعر وخيارات وقرارات إنفرضت علينا وعلى أرواحنا.  أما الجزء الآخر فبيبقى ناتج من إحتياجنا إحنا إلها بالتأكيد. 

هيك أوقات على تنوّعها، الشيء المشترك بينها في الغالب هو إننا خلالهم بنقنع أنفسنا إننا لازم نحاول نعيد ترتيب حساباتنا بكتير من التفاصيل في حياتنا وبنطرح أسئلة مصيرية وكبيرة وأحياناً صغيرة وتافهه، وبنعقد مواثيق مع حالنا وبنبني فرضيات مثل .. إننا نفكر إننا بنقدر نبقى "حد تاني" بيفكر بأسلوب جديد وإننا نحقق أحلام ونلبي طموح هواجس قديمة / جديدة .. أو إننا بنقدر نخلع ثوب الوجع ونجدد ثوب الفرح ونتخطى اللي راح .. أو إننا نعتقد إنه علشان إحنا بنمر بهاي المراحل وإحنا عم بنكبر وبنراكم تجارب فبالتأكيد دروس المرات اللي فاتت وعّتنا والتجارب اللي راحت نضجّتنا وبالتالي الموضوع راح يبقى أسهل مع الوقت .. أو نتأمل إنه اللي جاي لازم يبقى أحسن وأحلى أو بنعيش برعب من إنه يبقى أسوأ كتير وأوجع .. آه وكمان في ناس بتحلم بإنه اللي راح بيتأرشف أكيد والزمن كفيل بمحيه من الذاكرة ... إلخ.  وهالفرضيات ممكن تبقى صحيحة للبعض وتتحقق وممكن عمرها ما تتحقق للبعض الآخر أو تتحقق بشكل جزئي.  وبالغالب اللي بيفرق هو قدر "مستوى إمتلاءنا وإكتفاءنا" و "قناعتنا الحقيقية" بأي شي وكل شيء على كل المستويات، سواءاً اللي راح أو اللي عم بيجي أو حتى "إحنا الجديد" اللي بنطمح نصيره. 

بهيك أوقات، بنشعر بكم هائل من الذكريات والتفاصيل بتملانا وبتملى لحظاتنا وأيامنا .. صدورنا وأرواحنا .. عيوننا وكل حواسنا، وكلها مرتبطة شرطياً بشخوص وأحداث وتجارب ونظريات وقناعات ومشاعر وإحتياجات.  وكتير منها لو حكينا عنه لكتير ناس من اللي حوالينا، ممكن يبيّن شيء تافه أو بسيط أو من غير معنى أصلاً؛ ما حد بيحس فيه أو بيقدّر معناه وقيمته إلا إحنا، حتى لما بيحاول أهلنا وأصحابنا إنهم يبدوا تفهم أو تعاطف، بما فيهم الناس اللي ممكن يبقوا عايشونا بعض هاي التفاصيل أو حتى عاشوا تجارب شبيهه إلها .. برضه ما حد بيقدر يحس بنفس القدر والنوعية من الثقل والقيمة اللي بتحملها ذاكرتنا ومشاعرنا مثلنا.  

بهاي الأوقات، عندي قناعه (ويمكن أمل) إنه اللي حقيقي بيشكّل أي معنى حتى لو "معنى مرحلي" لكتير مننا واللي بيبقى مشكللنا مصدر لفوضى من المشاعر الكتيرة بتأثر علينا وفينا لفترة (بتفاوت) هو الكمّ الكبير من الذكريات والتفاصيل اللي إنزرعت بوعينا ولاوعينا .. التفاصيل اللي شكّلت وبنت حياتنا بالمرحلة/المراحل اللي فاتت؛ حتى لو رفضناها وقاومناها وحتى لو حاولنا نتمرد عليها وعلى أنفسنا.

وهالتفاصيل مخلوطة بكتير من التجارب والأحداث، ليالي وأيام، مناطق ومدن، شوارع وبيوت وأماكن ومواصلات، وأشخاص وناس كتير، ونقاشات وخناقات ومصالحات، و و و.

والتفاصيل هاي مش بس موجودة بقلوبنا ووعينا، لا وكمان في كتير من ممتلكاتنا الشخصية اللي بننصدم قديش ممكن تبقى بتحمل قصص لحظاتنا وأيامنا وحياتنا.  الصور، وأحياناً ملابسنا، وأحياناً تانية كلمات بنقولها أو أشياء بنعملها أو حد تاني بيقولها أو بيعملها، ملفات وأوراق وكتب .. قديش بنقدر نشوف فيها أحباءنا وأهلنا وصحابنا .. قديش بيخلونا قادرين نرجع نعيش لحظات حلوة ومرة وأوقات عشناها وعايشناها مرّت، ونحس ونحكي مع ناس حبيناهم وناس حبونا أو ضايقناهم وضايقونا، ناس راحت وما عادت موجودة بمساحاتنا .. نشوف مشاهد، ونسمع أصوات، ونشم روايح، ونتذكر طعم أو ملمس، ونحس ونعيش وجع أو خذلان أو أنين أو نشعر بدفا أو حب وبدغدغة جوانا.  قديش بيقدروا يرجعلونا كل هاللحظات والناس وكتير كتير من المشاعر والأحساسيس اللي آمنا بوقت إنها تجارب غير منتهية وناس بالتأكيد باقية؛ أو إتمنينا هيك على الأقل ويمكن صلّينا – بطرقنا المختلفة – لإنها تبقى ويبقوا!

هاي الأوقات فترتها (زمنياً) متفاوته وتأثيرها وأثرها بيختلفوا بإختلافنا كبشر وبإختلاف شخصياتنا وظروفنا ومحيطتنا وطموحنا وأحلامنا، وبيختلفوا برضه بناءاً على تقييم كل حد فينا لنوعية وقيمة وأهمية التفاصيل "القديمة" مقابل التفاصيل "الجديدة" اللي بتيجي (بقرار منّا) لتحتل أماكن أو مساحات اللي راح أو عم بيروح أو اللي بدنا إياه يروح أو اللي مفروض علينا إنه يروح، وبإختلاف خياراتنا لشو ممكن نقبل على حالنا ومستوى الكومبرامايز اللي مستعدين إله بالعلاقة مع الواقع الحالي اللي بنعيشه والثمن اللي مستعدين ندفعه بالعلاقة مع كل اللي كان.  وعلى فكرة تحويل ذكرياتنا والتفاصيل والمشاعر لـ "ندب" ما بيعني بأي شكل من الأشكال تقديرها والحفاظ عليها وحمل وإحتمال تُقلها .. لأنه بلحظة تحوّل أي شيء بحياتنا لـ "ندبة" وإن بقيت ظاهرة لحدّ ما، بنفقد أي وكل إحساس فيه. 

وبرضه بقرار منّا (سواءاً بإختيارانا أو كخيار أو بإنجرار)، بنحافظ أو بنتخلى عن ذكرياتنا والتفاصيل الثقيلة على أرواحنا وقلوبنا ووعينا .. بقرار منّا بنحدد لأيمتى بدنا إياها تبقى معنا ونضل حاسين إنها "مُحتمله".  

الاثنين، 15 أبريل 2013

لنْ يكتمل ...

تصوير هانية عسود - صحراء تونس

أولئكَ الغائبونَ عنْ حياتِنا،
لنْ يعلموا أبداً
بأنّ غيابهمُ المُشتهى
لنْ يكتمل ...

فلا هُم غابوا، ولا أوراحهمْ ولا ذكراهمْ
من وعيينا وأجسادنا وأراواحنا
- تلكَ التي أحرقوها قبلَ الرحيلِ وبعده -
غابت.

هانية عَسود
أبريل 2013

الجمعة، 29 مارس 2013

على كل المستويات



ثمةَ درس وَجبَ أنْ يُتعلّمْ ..
أن يُطَرزَ كوشمٍ على جدارِ الذاكرة
ولأن يُعلقَ - بثقلٍ - على بوابةِ الوعيِّ
تماماً .. كما مفتاح "حلمِ العودة" ولمٍّ الشتاتْ.

لمْ تكنْ أبداً خيبةً واحدةً
بلْ كانوا وما يزالوا كُثرُ متتالياتْ ..
منْ يُحدثَ شرخاً – تِكراراً - في روحٍ أو وطنٍ أو ذاكرة
لنْ يتوانى أبداً عن الإستمرارِ في دقّ عُنقِ الأساساتْ.

ذلكَ الأملُ بأنَ هذهِ المرة – في كلّ مرّة –
لنْ تُكررَ ما حصلَ وقيل بأنه: "خطئٌ، مرحلةٌ، ضرورةٌ أو ... إنتهى وفاتْ"
ولن تُعيدَ نفسَ الخيباتْ
ولنْ تأتي بالمزيدِ ..
ذلكَ الأملُ .. آنَ الآوانُ لهُ أنْ يَستسلمَ ويعلنُ الوفاة. 

هانيــة عَســوَد
مارس 2013

الجمعة، 15 مارس 2013

معتذراً

تصوير - هانيــة عَســود - جنوب أفريقيا

من كَسرَ الروحَ وأطفأ مراياها!!

كزهرةِ لوتسٍ نبتتْ فوقَ سطحِ ماءٍ إعتقدتْ أنهُ الوطن المُقدّر
تهشّمَ الوطنُ - معتذراً - عندَ أولِ همسةِ ريحٍ دغدغت عُمقه
فإنكفأتْ على ذاكرتها وإنكسرتْ.


هانيــة عَســـوَد
مارس 2013

الجمعة، 15 فبراير 2013

الـدعــارة

هانيـــة عَســـوَد 


من كام سنة وهالجملة بتدور في بالي؛

"الدعارة .. هي الكلمة سيدة الموقف خلال هذه المرحلة من التاريخ"

ولتوضيح مقصدي، بحب إني أدعو مستخدمي اللغة العربية لمراجعة معاني الكلمة الموضحة بالمعاجم وعدم تحديدها فقط بالمعنى المتعارف عليه إجتماعياً أو ثقافياُ.

الجذر: دعر و يدعر
دعارة: سُوءُ الخُلُقِ، خبث، شر، فجر وفسق، زنى.
يقال: في خُلُقِهِ دَعارَّةٌ: سوءٌ وشراسة.
الفسق: الخروج عن الشيء أو القصد، وهو الخروج عن "الطاعة."

التلخيص لِما هو موثق ببعض المعاجم: الدعارة - بالمفهوم الأعم – هي سوء الخلق والشراسة والخبث والخروج عن القصد.

ولأني بحس إنه التلخيص جيد جداً بس ممكن ناقص شوية – من وجهة نظري – فبحب إني أدعو علماء اللغة إنهم يضيفوا على المعاني التابعة لكلمة "دعارة"، كل الآتي:

التناقض ما بين المعلن عنه والمضمور، والتناقض الكبير جداً بين الأقوال والأفعال، والكيل بأكثر من مكيال معظم الوقت، والأقنعه والوشوش اللي بتتغير كل يوم الصبح حسب البرنامج وحسب المصلحة، تفضيل النميمة عن المواجهة، والمراوغة، البحث بشكل دائم عن مبررات خارجة عننا.  (هادا كله ممكن يتلخص بالكذب والخداع).  العمل فقط من أجل المصالح الفردية (مش حتى الشخصية اللي ممكن تتقاطع من آخرين) مما يعني - بأغلب الأوقات - العمل ضد المصلحة العامة، والطعن من الضهر، وحفر الحُفر والمكائد للغير، وإخفاء الحقائق والإستفراد بالمعرفة.   (هادا كله ممكن يتلخص بالخيانة).  التواطئ بشكل يومي مع كتير أشياء بنشوفها وبنقفل أعينا وأدمغتنا عنها، التراجع، الإستسلام للأقوى سواءاً المجتمع أو مصدر سلطوي محدد أكتر أو أفراد، المهادنة.  (هادا كله ممكن يتلخص بالخوف).  إقتحام حريات ومساحات الأخرين وإطلاق الأحكام وتحديد الصح والغلط. والخروج عن القيم أو حتى تخطي كل مفهوم "القيم." 

بكل حزن وللأسف الشديد "الدعارة" هي أحد المنظومات الأخلاقية اللي موجودة كل الوقت حوالينا لكن حسب ما أثبته التاريخ والواقع، هي مرتبطة بشكل مباشر وطردي مع واقع المجتمعات؛ بمعنى كل ما بتسوء الظروف بتنتعش هاي المنظومة الأخلاقية وبتصير الأداء الأكثر سيادة بكل مكان وعلى كل المستويات ومن ناس من كل الأعمار والخلفيات والمكانة الإجتماعية والسياسية والإقتصادية.  الدعارة بالسياسة، عند الأحزاب، بمجلس الوزراء والأعيان، بالحكومة؛ الدعارة بالعمل، عند الممولين والإداريين والموظفين والمتطوعين والمستفيدين؛ الدعارة بالدين وفي دور العبادة وعند الكهنة من كل الأطياف؛ الدعارة بالشارع، بالبنك، بالمدرسة، بالسوبرماركت، بالمول، بالتكسي؛ بالعلاقات الإجتماعية، بالصداقة وبالحب؛ في دوائر كل النخب والمثقفين والفنانين، والناشطين؛ دعارة بكل مكان، في محيطنا ومساحاتنا؛ وين ما بنولي وجهنا بنشوفها، بكل وضوح ومن غير أي حياء أحياناً؛ "دعارة" بكل ما تحوية المعاجم من معاني. 

وبما إننا بهالمرحلة الصعبة، بحب إني أحيي كل الناس اللي واعية للي عم بيصير ولسة قادرة إنها تقاوم - بأشكال مختلفة - وبترفض الإنصياع لهذا التيار الجارف واللي بالتأكيد بيعني إنهم بيضطروا أحياناً ليقبلوا بالخسارة على مستويات كتيرة لأنهم بيحاولو كل الوقت يبقوا خارج المنظومة أو ليسبحوا بعكسها؛ وبقلهم للتذكير .. حذاري من الكيل بعدة مكاييل. 

أخيراً، وللتوضيح بس .. النساء العاملات بالدعارة – بمفهومها الإجتماعي التقليدي – نساء على الأقل متصالحات مع ذاتهم وواضحات وصريحات بإنهم "عاملات بالدعارة" وبيتقاضوا أجر واضح وصريح مقابل خدمة بيستفيد منها ناس كتير همه داعرين وبيتحملوا الرفض والنبذ واللعنات اللي بتوقع عليهم من قبل ناس تانية جزء كبير منهم داعرين بس بشكل مقنّع بيقبله المجتمع لأنه غير متعارف عليه – حتى الآن – إجتماعياً وثقافياً وأخلاقياً ولغوياً بإنه قمة "الدعارة."